姚樂怡前晚在中環ClubNo.9行X-game時裝騷，蕭定一、黃百鳴和陳加玲等均出席捧場，身材勁爆的姚樂怡穿上比堅尼和牛仔迷你裙上台，場內即時響起歡呼聲。
積穀防饑
行騷時姚樂怡十分投入地彈彈跳跳，壓軸時，姚樂怡和一班男女模特兒在台上跳舞搞氣氛，站在她身旁的男模忽然表演除衫，初時high爆的姚樂怡大呼小叫，還跳埋一份，但當半裸男模脫剩泳褲，又激凸移近她時，姚樂怡即開始面紅，逐步彈開，男模繼續與女dancer大跳辣身舞，姚樂怡則嚇到瑟縮一角。
姚樂怡事後說：「我好少去呢啲場行騷，但今次酬勞真係多好多，我其實唔慣喺夜場着比堅尼，喺沙灘着就OK。」她更謂會繼續行騷搵錢，稍後還有四場騷，問她豈非變成小富婆？姚樂怡說：「做女人要儲啲錢，因為老來有依靠，積穀防饑呀，我已經買咗層樓，𠵱家畀老竇住緊，將來可能就係我嘅姑婆屋，不過如果搵到老公，當然最好住老公嘅屋啦！」
採訪：吳天慧 攝影：陳慧安
