無論係買相機、電腦，還是遊戲機，網上都有人大談受騙經歷，一大堆俗稱黑店的舖頭名列晒出嚟。係所言屬實，還是存心人身攻擊，筆者不作深究。反而想講嘅係，點解現今網上資訊咁發達，都仲咁容易俾人呃？網上有位讀中六的Blog友，以「今日不愉快的經歷」為題，講自己到鴨寮街一間連鎖店買DC的被騙經過。佢一心諗住買部Canon機，點知俾Sales講多兩句就買咗部PanasonicTZ1水機。最搞笑佢話：「問咗Sales成十次係咪行貨。」見佢咁水魚，對方當然話係，點知返屋企俾家姐發現跟個兩腳插蘇。
網友雖然對呢位中六生深表同情，但不忘話佢毫無常識、買機又唔搵個熟悉DC嘅朋友陪。筆者絕對同意網友所言，事關受害者識得上網大吐苦水，又點會唔識事先詢問網友意見？或到相關品牌嘅網站先搵料後買機。俾人話多兩句後，佢話嗰間黑店仲有網址，好似幾可靠。點知網友好諷刺咁話，間黑店早就黑到出晒名。所以今時今日買IT產品都俾人呃，除咗怪自己，還能怪誰？
記者：陸俊雄
網址： http://www.uwants.com/viewthread.php?tid=2965993