繼手塚治虫、石之森章太郎同橫山光輝之後，另一位喺70年代非常受歡迎嘅日本漫畫家石川賢又跟漫畫迷說再見。憑繪畫漫畫《三一萬能俠》廣為人知嘅石川賢，今個星期三（15日）因為心臟病逝世，享年58歲。佢生前畫咗唔少代表作品，除咗多套《三一萬能俠》漫畫之外，仲有《魔獸戰線》、《虛無戰記》同《魔界轉生》等。