信和置業（083）大角嘴新盤一號銀海近日正式向業主發出入伙通知書，第一批將喺今個月29號收樓。網友Anti_block喺《香港討論區》上，將呢封通知書形容為「催命符」；pig112講得更加絕，佢話︰「好似清朝時代咁，望一望太陽位置，然後拋出斬令牌，大聲叫︰時辰到，斬!!!!!」
大家講得咁激，無非係因為發展商去年高價賣樓，點知一年後嘅今日，樓價回落咗好多，一班業主未入伙已經輸錢，又驚上唔到會。不過，gemoney好有信心銀行一定會撐佢哋︰「90%嘅單位可以估足價！」
業主企硬唔劈價
另有一批網友就企圖「趁火打劫」，想知道有冇平貨執？其中V.Persie仲話，如果有人劈價至4500蚊呎，佢會考慮買番間。
不過，聽地產代理講，一號銀海班業主都守得幾緊，叫價頂多係平手離場，暫時都未去到大幅劈價嘅地步。佢哋話，屋苑𠵱家大約有150個單位放盤，海景單位平均每呎叫價9000至11000蚊，園景單位就平均每呎叫價7500至8000蚊。睇嚟V.Persie想執平貨，仲要等多一排。