今個星期的大新聞,當然是英超聯轉播權行將易手,傳聞中3年的香港區轉播費高達2億美元,大公司資金豐厚又精於做生意之道,出得價就是認為值得也。作為小市民,關心的則是如何以合理消費,獲取喜好的娛樂。
香港政府帶頭施行5天工作制,但私人機構未見普遍跟隨,步伐快及事務繁忙的香港人,其實真有多少時間可以花在睇波上呢?我要講馬睇晨操,工作時間另類不能作準;至於返「正常」工的朋輩們,通常都是在周六、日聚會時才看一、兩場。
所以,作為消費者,記緊唔好貪多,諗清楚自己最常看的是甚麼?就不用包羅萬有的裝收費電視,傷及荷包了。
不妨與朋友合作
又或者可跟朋友採取「聯防」策略,你裝A台,佢裝B台,除了過足睇波癮之外,還可以促進或考驗彼此友誼呢!咪住,點解會係考驗?睇波如同坐麻雀枱,真性情必盡現;如果更押了注,你捧上盤,我賭了下盤之時,老友也變成對頭人啦。
張美德
記者出身的著名馬評人,現職馬會節目主持人。