今個星期的大新聞，當然是英超聯轉播權行將易手，傳聞中3年的香港區轉播費高達2億美元，大公司資金豐厚又精於做生意之道，出得價就是認為值得也。作為小市民，關心的則是如何以合理消費，獲取喜好的娛樂。
香港政府帶頭施行5天工作制，但私人機構未見普遍跟隨，步伐快及事務繁忙的香港人，其實真有多少時間可以花在睇波上呢？我要講馬睇晨操，工作時間另類不能作準；至於返「正常」工的朋輩們，通常都是在周六、日聚會時才看一、兩場。
所以，作為消費者，記緊唔好貪多，諗清楚自己最常看的是甚麼？就不用包羅萬有的裝收費電視，傷及荷包了。
不妨與朋友合作
又或者可跟朋友採取「聯防」策略，你裝A台，佢裝B台，除了過足睇波癮之外，還可以促進或考驗彼此友誼呢！咪住，點解會係考驗？睇波如同坐麻雀枱，真性情必盡現；如果更押了注，你捧上盤，我賭了下盤之時，老友也變成對頭人啦。
張美德
記者出身的著名馬評人，現職馬會節目主持人。