行版PS3經已喺噚日推出市面，亦即表示唔少人能以合理價格獲得心頭好，都算係一份相當唔錯嘅聖誕大禮。奈何跟機遊戲僅得三款，如果全部都唔啱玩、想試吓啲鬼佬風味，咁又可以點呢？其實日版水貨早就推出咗《Resistance人類沒落之日》呢隻主觀射擊作品(FPS)，佢有齊時下同類遊戲嘅特色之餘，網絡對戰仲最多支援40人，勁抽過Xbox360，單係呢點已經有理由拎佢返屋企日操夜操！
記者：陳福榮
鳴謝：寶源（27206698）
點解行版《Resistance》至今都仲係冇發售日期，估計可能真係同上網收錢嗰Part有關，亦因為咁我哋經日版主機同日版遊戲嚟做測試，發現只要Set好各項資料想上網同㗎仔玩都冇乜問題，20人對20人嘅墟冚場面絕對唔講得笑；當然香港玩家遲啲點搞就要等官方公布詳情喇。講番隻Game先，佢包括咗故事模式、二人合作模式以及對戰專用嘅多人連線模式，而最後者更支援毋須上網嘅四人同時互抽，可以任揀大屠殺或者搶旗仔等玩法，儘管未上到網都可以同班Friend決一高下先，當然要準備好幾個PS3手掣啦，記住舊掣係絕對用唔到㗎！
外國網站評９分
之前有傳該作品做得唔好，唔只畫面差且操控亦唔順手，但經過小記親身測試後又發現冇網民講到咁衰，PS3首批Game嚟講絕對算係合格有餘，起碼唔似《高達》咁窒格，搞到人眼花撩亂。呢隻由炮製過《Ratchet&Clank》系列嘅Insomniac所負責嘅主觀射擊遊戲，參考晒所有同類出色作品嘅優點，操作、整體表達同畫質等都叫OK，難怪IGN同GamePro等外國網站都畀成9分以上，高分過令人頗跌眼鏡嘅《Genji》唔少，因此銷量亦比《Genji》為多。
佢係用一個從未發生過二次大戰嘅時空作為舞台，作為美國士兵嘅主角為調查英國嘅異常情況，因而飛往當地同班病毒獸「奇美拉」戰鬥，結果逐步發現呢啲病毒係源自俄國生化實驗室，為阻止「奇美拉」全面征服人類世界主角冇法子唔大開殺界。
Fing手掣可以救火
同《RR7》可以用嚟控制架車甩尾差唔多，《Resistance》亦支援PS3手掣嘅六軸感應系統，譬如玩家俾班蜘蛛怪物纏身時，就要狂Fing個手掣咁先至甩得走，否則好快就會俾佢哋整死。假如俾啲火舌燒中身體，亦都可以係咁Fing手掣嚟整熄啲火，呢兩樣都算係有啲新意思。而且當劇情發展到咁上下，仲會有交通工具如吉普車等任你揸，唔使成日齋靠雙腳係咁走咁悶啦！
Game書行尊有嘢講
基於《Resistance》並唔係行貨作品，普遍舖頭都冇得試玩，齋得我喺度講意見可能唔夠全面，不如問吓兩位Game書編輯有乜意見？
朱生@G-Zone
「象徵意義大於一切，想話畀大家聽『PS3都有FPS遊戲，仲係20對20嘅網上對戰』，作為攻打歐美據點同迎戰Xbox360嘅第一步，總叫有睇頭。」
電玩太郎@GameWeekly
「畫面冇想像中咁勁，表現算幾流暢，但冇乜戰爭Feel，遊戲難度幾高，體力好快就扣晒。話就話企定定會自動補血，但係等好耐先補得少少。」
PROFILE
機種：PS3
廠商：SCE/InsomniacGames
類型：FPS
人數：1-4人(連線40人)
推出日：發售中
價錢：約$399
