港股升破19000關之後，升勢慢咗落嚟，個市升咗咁多，喺高位唞吓先，其實好正常，昨日恒指升28點，成交縮咗啲，畀人一種「不安」嘅感覺，好似唔夠力再上，但係成交仲維持喺500億樓上，唔算冇動力，再睇吓全周嘅成交，就諗到周線圖會係點樣──大成交支持嘅大陽燭走勢，點會唔夠力？
話咗個市升都會係輪流炒兩隻主要成份股，昨日中移動（941）轉為橫行，連續跌咗5日嘅滙控（005）就即刻轉為強勢撐住個市，收市現「倒轉錘」，喺近日嘅低位兼有大成交，下個禮拜一裂口上升嘅機會好大。
近日升咗好多嘅國內銀行股齊齊整固，但招行（3968）走勢偏強，原因好易明，因為佢前日喺高位跌咗落嚟先，睇番其他同類股份嘅走勢圖，應該整固多一至兩日又可再留意。
華能C輪3512：油價跌，電力股有番啲生氣，華能（902）昨日升1.9%，報收6.29元，股價早幾日跌穿咗10日線之後，喺10日線同20日線之間拉鋸，隨時破關下滑，都幾得人驚，不過，昨日大成交支持股價升穿咗條10日線，成個圖就唔同晒，睇個勢會上試6.50元阻力，破位睇6.80元。
華能C輪3512昨收76仙，槓桿率8.3倍（有效6.3倍），行使價5.55元，屬價內，對沖值0.76，引伸波幅23.1%，正股升上6.50元，3512應該喺95仙樓上，正股上試6.80元，隻C輪應該唔會低過1.25元。
正股只要升多1日，升勢就更為確定，呢個價買番啲，正股跌穿6.10元止蝕。
俊樺