南京名模熊黛林近日因為坐郭富城順風車而傳出緋聞，呢位天王新歡比起黎明女友樂基兒更搶風頭。大前日緋聞一出，正喺西港城做騷嘅熊黛林即時俾傳媒同大會人員包圍，十足女王出巡咁，認真架勢。
前晚熊黛林同混血名模兼城城舊愛AmandaStrang同場出席海港城聖誕亮燈儀式，𢱑完銀就即刻消費。雖然前者升格為人氣女模，但難得佢着嘅、食嘅仍然係平民水準。
當晚熊黛林7點零鐘收工後，換上運動外套同牛仔褲，同一位女伴齊逛海港城，本來佢諗住去商場裏面嘅翡翠拉麵小籠包開餐，但門外大排人龍，所以攞籌後，就先陪女伴去pedderred試鞋。
揀啱即買唔試身
見女伴揀唔啱心水，熊黛林即刻行去ZARA掃貨，呢間西班牙百貨公司賣嘅衫出名價廉物美，而熊黛林都睇中幾件，奈何試身室外打晒蛇餅，結果佢連試都慳番，揀啱size就行去櫃位驗貨畀錢，買咗三件薄冷衫，埋單1,000蚊有找。
之後熊黛林同女伴折返小籠包店，但依然未有枱，惟有轉軚坐保母車去金巴利道嘅大上海一品香食上海菜，點嘅菜式有皮蛋豆腐、四季豆同東坡肉等，由熊黛林畀錢，盛惠350大元，歎足一粒鐘之後，至施施然坐車返上環嘅公司宿舍休息。
