參加九龍塘會七十五周年餐舞會，與投資R同席，醒起投資R曾參加劍橋八百年校慶晚會，問佢邊一年畢業？投資R話：「唔好講笑，我喺英國讀會計而已，考到CA（特許會計師）唔係一定要從劍橋畢業嘅。」咁左丁山再問：「點解你會參加劍橋校慶晚會呢？」投資R答：「我個女係劍橋校友吖嗎！」哦，原來係咁，恭喜晒。R千金在劍橋讀理科，再到倫敦大學讀投資管理碩士，即刻入咗投資銀行，薪金優厚。投資R嘆一聲話：「薪金係好，廿幾歲女先至捱得住啫，一個禮拜起碼有兩日開通宵，平時冇十一點後唔會返到屋企。試過一次朝早七點半返到嚟，沖完涼換件衫，未到八點又衝出門返工，投資銀行啲工真係好惡打。」
其辭若有憾焉，心則實喜之，投資銀行工係今日最高薪最多花紅嘅工作，捱得住嘅話，他日可成千萬美金富翁。投資銀行業務空前好景，二○○六年一至十月，據一間數據公司Dealogic指出，投資銀行嘅亞洲業務帶來總收益五十二億美元，比五年前增加兩倍，領先者係高盛，佔咗其中四億五千五百萬美元，其次係瑞銀、野村。《金融時報》（十一月十八日）講，大型投資銀行嘅核心收益（來自亞洲）急升，亞洲業務佔整體收入16%至17%，係歐洲嘅三分二，以目前增長率計，未來兩三年會超越歐洲，故此亞洲係投資銀行必爭之地，各大行紛紛在亞洲招兵買馬，其中當然以香港區為中心啦，幫中國國企民企上市、配股集資、做併購顧問、投資海外等業務，梗係需要兩文三語人才。
唐英年司長曾經私底下向本港大學講過，點解本地大學生好少打入世界級投資銀行，本地生究竟有乜嘢唔掂？呢個問題大咯，英文啦、普通話啦、presentationskills啦、國際知識啦、平時唔睇《金融時報》、《經濟學人》啦，總之問題一大堆，非一時之間可以修理好。賓架W出身本地大學，在投資銀行早已鼎鼎有名，話要捐錢請專家做培訓幫助啲師弟師妹（要選拔過）提升presentationskills喎！