傳統基金股繼續抬頭，噚日輪到偉易達（303），升3.5%。該公司主席黃子欣表示，若年結時持有太多現金而沒有特別資金需求，不排除派現金股息回饋股東。黃主席上個月先至話，不一定會趁公司成立30周年派特別息，以免被人估到，唔知點解忽然改口風。
所謂被人估到，相信係指早前花旗發表嘅證券報告。該行預期，偉易達明年手頭現金達21億元，正值偉易達創立30周年，預期會派特別息，估計全年每股派息達8元，股息率超過20厘，維持買入評級，目標價定為47元。
另一間大行滙豐證券更加樂觀，預期今年偉易達嘅V.Smile操作台銷售持續增長，調高偉易達07年度盈利預測8.7%至1.41億美元；08年盈利再調高4.4%至1.61億美元，目標價55.3元，建議增持。
摩通唱好中油潔能
噚日中油潔能（260）突然裂口升近1成，收市升17%。歐陽風上港交所（388）網站睇有冇最新通告，令到股價有此表現，但消息欠奉，直至下晝，先至發現原來摩根大通同佢出咗份報告，建議買入，1年目標價睇1.10元。
中油潔能經營壓縮天然氣加氣站，摩通話佢同內地巴士公司取得長期供氣合約，同時又向天然氣供應商取得長期穩定供應，因此盈利會穩定增長。
呢間公司有好多外資大行做股東，除於月初曾增持過嘅摩通之外，仲有荷銀同德銀，照咁推測，呢兩間行係咪遲吓都會出報告睇好？
歐陽風