中華煤氣嘅大埔天然氣接收站噚日正式啓用，中煤梗係不敢怠慢，除咗成個中煤董事會都嚟之外，仲特登搵特首煲呔曾主持啓用儀式。中國人素來有來有往，既然特首咁畀面，人稱「四叔」嘅中煤主席李兆基當然畀番面啦，將成個啓用儀式嚟撐煲呔曾個「藍天計劃」。你敬我一尺，我敬你一丈。
話說中煤噚日喺大埔廠搞咗個簡單而隆重嘅啓用儀式，差唔多過百嘉賓嚟晒參觀，親身參與呢個儀式之餘，再順便參觀一吓呢個可謂全港資源命脈之一嘅煤氣廠。中煤個儀式好簡單，就係要一班嘉賓作勢扭轉數個煤氣掣，之後個背景──港島全景就大變身！
一時感觸話當年
巧妙就係呢個變身，嗰幅原本係黑白色嘅港島背景，一變就變成藍天白雲嘅靚靚港島全景！真係估唔到四叔除咗投資眼光獨到之外，待人處事都咁細心！華華相信，就連煲呔曾都好有驚喜，因為估都估唔到佢只係講吓啫，咁快經已有人將佢嘅宏願變為事實！四叔真係有情有義！
喺儀式上，四叔仲真情流露，一時感觸話，佢入咗中煤董事都有28年，能夠睇到中煤壯大，仲睇到呢個接收站啓用，真係又自豪又開心。華華諗，中煤股價由98年嘅5蚊升到𠵱家差不多18蚊，其他中煤嘅小股東都應該好似四叔一樣咁開心！
[email protected]
