經常自稱SC的恒生劉順銓，快將調任中國業務處嘅商業銀行業務主管，新任期於本月20日生效，相信呢幾日，恒生好快公布佢嘅繼任人。究竟邊個會頂替SC坐助理總經理兼個人理財業務主管個位呢？
據聞William梁永祥正「度」緊，個位要睇幾瓣：存款、樓宇貸款、信貸、客戶服務等，下面有兩位女將，包括信用卡及個人信貸業務主管關穎嫺，以及樓宇貸款業務主管譚麗琼會唔會升上？不過，華華聽講，負責睇分行業務及直銷銀行業務主管曹達智都有機會，加上佢已經係「助理總經理」級數，更加順理成章啦！
據SC形容，佢嘅調動係為咗配合銀行未來五年急速發展嘅計劃，佢同太太明年就可能會調去上海，至於大女繼續喺海外留學，「10A」狀元細女則留喺李寶椿書院寄宿。
SC做個人理財業務前，係做商業銀行，直到藍章華走咗去大新後，佢先被調去睇個人理財業務，轉眼又要重投商業銀行懷抱！不過，今次要返大陸，雖然SC算得上係長袖善舞，但佢並唔好「杯中物」，唔知慣唔慣「吹喇叭」呢？