近日內地無論大小官員或國企老總都頻頻換人，周三又多一名，佢就係中石油集團總經理兼黨組書記，又係中石油董事長陳耕。之不過，佢係正常退休，接棒嘅並唔係「空降師」，而係坐第二把交椅嘅中石油集團副總經理、中石油副董事長兼總裁蔣潔敏，雖然只做咗內部通知，仲要等正式公告，但蔣總𠵱家只係51歲，可以話正值壯年，如果唔俾國家調走，中石油又冇發生咩重大生產意外，要佢孭飛，起碼可做多9年，對中石油係好事嚟！
瑞信噚日「剛巧」發表報告，就建議客戶由中石化換馬到中石油或中海油，原因係嫌中石化兩邊唔討好，油價跌對原油開採業務不利，油價升又對煉油業務不利，但係望吓佢俾中石油個目標價，冇辦法唔發出啋一聲，事關只得8.3蚊，中石油昨日跌0.11%，都有9.04蚊啦！