精神麻麻哋，唔係喇！都係穩陣啲，坐巴士出去練波；如果揸車瞌瞌眼瞓，失去控制，咪隨時出事！屯門出九龍，合埋眼兩秒都唔得，都係博唔過！
意見滔滔不絕
上到巴士，例必坐樓上後座，歎杯乳酪，再欣賞沿途風光。攰咩，大可以閉目養神！坐前一排嗰位阿哥，舉高份波經，起勢咁刨！份報紙舉到咁高，咪一齊睇囉！奇怪在呢位阿哥，分零鐘又擰轉身，望向車廂後排，反應敏捷嘅我，迅速將視線轉向窗外，心想：佢無理由知道我偷睇佢份報紙㗎？
搞掂杯乳酪，準備休息之際，嗰位阿哥突然企起身，嘩！搞咩呀？巴士都未有耐到汀九，唔係落車呀嘛？竟然，佢向後行過嚟，好好中氣咁問：「你係咪馮奇呀？唔好怪我唐突，我有睇你哋有線，唔好介意，我想畀啲意見。」佢講到半架巴士啲人都知，我又豈能介意呢？
結果，都係一樣，合埋眼兩秒都唔得！到咗美孚，情況仲未解決，巴士阿哥唔係未解決，佢係未講完，OMG！
馮嘉奇
碩士球員讀萬卷書，親身歷盡各國足球風情。