根據Autodata資料顯示，全球第二大車廠日本豐田（Toyota）在美國市場的銷售已連升17個月，上月銷量便按年升9.2%至18.9萬輛。
面對亞洲車咄咄進逼，美國三大車廠通用、福特及克萊斯勒嘅掌舵人日前約見總統布殊，訴苦兼謀對策，而上周喺國會中期選舉中大捷嘅民主黨亦向布殊施壓，宣稱要打救汽車業。
喺《華爾街日報》討論區，舉行咗一項名為「聯邦政府應否向美國汽車業提供財務資助」嘅調查，結果有87%網友反對。
網友phlegia1話，企業經營及管理不善，係內部問題，唔應該搵納稅人啲錢去津貼。
irishorse亦反對由政府提供援助，直言呢個係治標唔治本嘅辦法。佢覺得本土汽車業唔夠亞洲車爭，完全係因為業界喺工會施壓下，工人福利比外國車廠優厚，令成本加重，大大降低咗競爭力。
汰弱留強自生自滅
Alphadorian完全同意呢位網友嘅講法，仲話車廠其實可以考慮改善部份生產方法，因為有唔少工序可以用機器代替人手。如果要令垂死嘅工業重生，除咗精簡人手外，仲可以諗吓將啲高成本嘅工序外判去其他地區。
chrisknop就話，政府出錢資助車廠，唔見得對美國消費者有任何好處，最終受惠嘅只有股東；與其要動用納稅人數以億計嘅錢去幫呢啲企業，倒不如汰弱留強，由得佢哋自生自滅﹗
事實上，美國三大車廠第三季業績均出現虧損，目前只靠不斷「瘦身」來度過時艱。據市場估計，到2008年，當地汽車業將裁員7.8萬人。