近期投資版嘅推介相當有水準，希望今次續令球迷獲利。言歸正傳，今期筆者揀嘅大藍籌屬於西甲聯賽事，捧馬德里體育會作客贏利雲特；而二、三線股係嚟自英超聯，冷門推介保頓作客愛華頓開下盤兼博冷W。文：賴恩
先講保頓呢隻二、三線股。支持筆者揀佢哋嘅原因有兩個，第一係領隊質素，第二係實力。首先講講領隊質素，無可否認愛華頓領隊莫耶斯年輕得嚟領軍確有一手，可惜𠵱家要佢帶兵唔係落場踢波，所以喺領軍經驗方面，佢始終輸蝕俾老謀深算嘅保頓領隊艾拿廸斯。
講到「大儍」艾拿廸斯，呢位52歲嘅教頭，總係俾人一種「別人笑我太瘋癲，我說他人看不穿」嘅感覺，搵埋班人哋唔要嘅棄卒，再唔係就搵啲暮年殘將；但結果證明呢種「即食」嘅組軍方法不知幾咁成功，而且睇佢「贏縮輸谷」嘅調兵遣將戰術，經常搞到對手無晒符。
愛華頓前線死火難作惡
配合「大儍」嘅戰術，始終都要班球員交到貨，守嘅有賓希姆同埋美廸，攻嘅有廸奧夫同埋奇雲戴維斯，中場負責供應既就有史必同埋路蘭，勝在有經驗而且合拍，何況仲有個伺機突圍嘅安歷卡。
反觀愛華頓方面，安祖莊臣連續7場比賽無貨交，比亞堤又淨係識入12碼，「弗」到漏嘅卡希爾受傷要唞到年尾，搞到「拖肥糖」變成一隻折翼小鳥，拍極都冇辦法飛得起。呢場波，保頓立於不敗之地，若嫌單W太博，讓球「下盤」必捧！
大藍籌馬體會有「利」可圖
講完二、三線股，梗係要講吓馬體會呢隻大藍籌，雖然話有好多主將受傷，尤其是係麥斯洛廸古斯、米斯達同埋馬田柏杜夫，搞到入球能力驟降。不過大家千祈唔好遺忘「新金童」費蘭度托利斯，仲有個超新星阿古路；上場反勝維拉利爾，已經開始合拍兼有火花擦出，今次作客實力較差嘅利雲特，應該會更加大放異采。
何況利雲特方面近況亦唔見得好，識入波嘅反而係卡普同甘馬曹呢班中後場球員，前線嘅列加踢到冇晒影；今場波仲有艾華路美亞停賽㖭，攻守俱弱，何來搶分本錢？
投資特攻隊金句
踢波除咗講表現，仲要睇埋領隊嘅功夫有幾深，「大儍」能夠將一班棄卒同老將化腐朽為神奇，就已經係信心嘅保證。