九龍塘會慶祝七十五周年，十一月十日喺洲際酒店擺幾十圍，場面熱烈。可惜呢間酒店好似在服務方面退咗步，侍應上菜唔係照五星酒店規矩，先畀女士，後畀男士，而係毫無章法，侍應求其順手就放低，後來聽秘書V講，最近佢去九龍香格里拉、麗嘉出席中式宴會，侍應上菜亦是如此。諗落呢班侍應唔知係唔係散工，平時訓練合作欠奉，總之快快趣做完就算。幸好穿着黑裙之女侍應斟茶遞水十分殷勤，快捷妥當，算係為洲際酒店攞番啲分數。
出席名人之中，田北俊議員名氣最大，佢代表會員上台致詞，話自己一九七九年入會，父親田元灝喺六十年代入會，屬資深會員，不過近年事忙，少咗去九龍塘會打網球喎。又有一位前任會長彭錦榮，曾做過十幾年會長，做到八十幾歲先至退下來。問富翁V：「彭會長睇落好精神，雖然要人攙扶，仍可行上台影相，站立挺直，佢今年幾多歲呀？」富翁V話：「唔好嚇親你，彭會長今年一百零三歲咯！」左丁山聽見，幾乎跌咗杯紅酒落地，左丁山在公開場合中見過嘅最老人物，就係邵爵士，佢明年慶祝一百歲。估唔到呢位彭先生一百零三歲，精神面貌與邵爵士比較，一啲都唔輸蝕。邵爵士聽講係氣功高人，咁彭先生憑乜嘢秘方延年益壽？富翁V話：「彭老先生日日到九龍塘會游水，數十年如一日！」唔怪得富翁V鬼咁神心，朝朝起身後就揸車去九龍塘會，跳落泳池晨操。想落游水的確有益，馬圈名人大馬主梁校長白髮白鬚，精神赳赳，今年八十一歲，日日中午到沙田馬會泳池游個暢快。
跟住碰到兩代會員環保C兩兄弟與父母出席宴會，環保C搞環保工業，做得有聲有色，佢弟弟與弟婦在大學工作，一個負責籌款，一個負責內部稽核，佢哋嘅爸爸七十八歲咯，與阿媽在舞池跳慢華爾茲，唔知幾爽神，又係游水與網球之功喎；另一對睇落起碼七十歲嘅夫婦大跳牛仔舞，相信佢哋嘅孫兒孫女都冇咁勁。想健康長壽，快快加入九龍塘會！