富翁V好畀面，邀請左丁山出席九龍塘會七十五周年誌慶餐舞會，到洲際酒店飲番杯，唔係佢講起，左丁山都唔知九龍塘會已經有七十五年咁耐歷史。遙想一九三一年，九龍塘不知是甚麼樣子，於是搵出一本三聯書店出版，鄭寶鴻、佟寶銘編著嘅《九龍街道百年》睇吓，但裏面唔見有九龍塘嘅圖片，只見到一張一九二九年嘅太子道、窩打老道交界嘅照片，左邊有英式別墅，右邊係荒地，相信喺一九三一年之時，九龍塘區唔會有好多間屋，而當時嘅居民已經想到開闢會所作游水、打網球之用，可見十分有錢及頭腦先進。
九龍塘會嘅會員當然唔限於九龍塘居民，有資深會員推薦，經值理會開會通過就可以成為會員，富翁V問左丁山有冇興趣，入會費係二十五萬元。左丁山荷包冇咁多閒錢，只好說句多謝，況且自己居所離開九龍塘稍遠，又冇時間去打網球，入咗會都係盞交會費啫。問富翁V入會之時交幾多錢會費，富翁V騎騎笑話：「五百蚊啫，嗰陣都幾多㗎。」多極都係當年大學生畢業後第一份人工（約千一蚊一個月）嘅一半，多乜嘢吖，今日入會費二十五萬，係大學生第一份人工（萬二銀計）二十倍強，差好遠啫。富翁V喺港大與陳坤耀同一時期，佢都唔記得是否高班過陳坤耀，嗰陣時港大生係天之驕子，佢一九七○年加入九龍塘會，銀紙綽綽有餘，今日佢位公子加入九龍塘會，怕要佢大力津貼矣。富翁V話：「我哋個會好重視家庭氣氛，好多會員根本係三代同堂，爺仔孫皆係會員，故此對會員子弟入會，有優惠，仲可以分期付款㖭。」
唔怪得，洲際酒店內真係見到兩三代人一齊參加七十五年會慶，玩得不知幾高興。見此場面，想起以前九龍塘會值理鄧賢博士（中國第一位保險學博士）在生之時久唔久就請左丁山到九龍塘會食飯，叫左丁山入會，當時年紀輕，唔識諗，婉拒好意，到𠵱家，邊度有閒錢入會吖！