講到法甲，兩大傳統班霸馬賽、巴黎聖日耳門亦係衰到貼，需要爭取盡快反底。數一數，原來馬賽聯賽加埋盃賽連輸5場，同8月底至9月中連贏5場，完全係兩回事。法國國腳中場列貝利因為鼠蹊傷，可能要提早「冬眠」，唔緊要，馬賽禮拜日嘅對手只係華倫西恩斯，對方今季7場作客聯賽攞得1分咁大把，馬賽讓單「車」，濕濕碎。
聖日耳門必打爭氣「波」
巴黎聖日耳門近兩場聯賽攞得1分，排名跌到去第12位，再唔贏，教練拉甘比份工就凍過水。聖日耳門近兩場失威，全因射手保列達早排衰多口，上個月鬧女旁證係「母牛」，搞到近兩場波坐波監。呢位葡萄牙名將禮拜六迎戰波爾多時復出，出柙猛虎一定爭「士哥」掃烏氣。波爾多歐冠盃出線無望，但跌個橙都想執番個桔，仲想爭小組第3名踢歐協盃；話晒有歐冠盃迎戰加拉塔沙雷嘅後顧，今輪聯賽會留力都唔定。