西甲聯方面，皇馬喺上場聯賽作客奧沙辛拿，憑「雲佬」雲尼斯達萊食咗鋪大四喜，輕輕鬆鬆就贏4:1；但之前一場聯賽佢哋居然喺主場輸畀切爾達，雖則冇拜仁爆得咁甘，但個客W都有成7倍。今個禮拜六佢哋迎戰實力一般嘅桑坦德，若然再贏唔到，真係唔知點同班高層以及球迷交代。
趁巴塞病皇馬急追分
皇馬𠵱家落後死敵巴塞隆拿3分，但巴塞𠵱家鬧前鋒荒，伊度奧、美斯同埋沙維奧拿都重創，禮拜日出征今屆喺主場表現唔錯嘅馬略卡，3分唔係執硬，所以皇馬隨時將彼此嘅距離縮減至1分，甚至0分都未定。
講開「雲佬」，呢位荷蘭射手今屆離開英超曼聯嚟到西甲搵食，仲係咁「弗」，除咗食大四喜之外，之前都試過梅開二度同埋連中三元；照咁計，佢喺單一一場比賽試過入1球、兩球、3球或者4球，係時候入5粒。𠵱，唔通呢個創舉就係對桑坦德時發生？