馮仁昭四圍超：
鄧穎芝、關楚耀蒲吧斷正　四眼男頂包

現年22歲女歌手鄧穎芝，噚日凌晨同衞詩緋聞男友關楚耀蒲吧，但鄧穎芝發現有記者追訪後，即時搵一名四眼男伴做擋箭牌，同對方親熱蹺手離開，表現都幾此地無銀。

稱交收羊脂膏

鄧穎芝同關楚耀噚日凌晨約埋幾個朋友夜蒲跑馬地Alabar，其間鄧穎芝知道有記者在場，唔知係想聲東擊西抑或真係趕住走啦，蒲到兩點零鐘，就丟低關楚耀，同一男一女友人先行離開。現場見一頭金髮嘅鄧穎芝與同行一名戴眼鏡嘅男伴蹺手而行，之後由女方駕駛約值48萬嘅平治跑車，載對方到中環荷李活道時，兩人喺車廂喁喁細語15分鐘後，四眼男伴至落車鬆人。
噚日鄧穎芝同馮仁昭傾開電話，佢話前晚約咗幾個朋友飲嘢，咁啱大家都識關楚耀，所以約埋一齊，至於點解會同四眼男伴喺車廂傾偈，佢解釋話：「佢喺澳洲返嚟，我拜託佢幫我買羊脂膏，大家喺車上交收啫。」對於同四眼男蹺手，鄧穎芝話：「我成日都蹺住啲人，無論係男定女，佢係普通朋友，佢唔係追我。我冇拍拖，都冇人追。」另外，關楚耀噚日到商台宣傳新歌《守護者》。