一入春和樓，有濃濃一陣餃子肉香撲面而來，初嚟甫到最忌亂叫亂點，一於叫招牌餃子實冇衰！餃子上枱，裝滿龍船咁大隻碟，真係好鬼北方風味；負責招呼嘅兩位女侍應非常標致，原來係老闆兩個女Ivy同Hiro，Ivy話：「春和樓喺度開咗8年，我哋只用新鮮肉，其他人貪平用雪肉，就點都唔及我哋做嘅咁鮮味！」再細睇呢度嘅醬汁用料非常講究，點餃子的蒜香豉油同辣油全部自家製！據知Hiro仲係包餃能手：「曾經有雜誌做測試，考我1分鐘包幾多隻餃，我最高紀錄係30隻，仲攞埋冠軍㖭！」
食客見到靚女難免口花花，姐姐Ivy話：「曾經有客問我攞電話，咁我咪畀個舖頭電話佢囉！」閒談間，Ivy仍一眼關七，以20歲出頭而言，真是罕見的老練：「我有啲朋友同我同年，搵唔到工做就攞綜援度日，我覺得人一定要靠自己雙手搵食先至得！」記者、攝影：朱崇德
春和樓招牌餃子$35
用豬肉、西芹及冬菇做成，肉香鮮味；配食的豬骨湯是熬足8個鐘頭的老火貨色。
糖醋骨$42
老闆兼老竇強哥做呢味糖醋骨酸甜適中，厚切大嚿豬扒肉，外面金脆裏面食落有肉汁！
春和樓餃子（27258473）
地址：油麻地彌敦道466-472D號地下（近循道中學）