鄭中基(Ronald)唱歌唱《無賴》,演戲的角色又是搞笑居多,但在電影《3分鐘先生》中扮演為人性急的父親,不再像以往般單是搞笑,而是要演出更多內心戲,導演陳嘉上也稱讚Ronald的表現,並認為這齣電影會令人感動。
鄭中基近年在影壇十分活躍,參與的電影大都是搞笑為主,務求令人捧腹離場。雖然Ronald今次在《3分鐘先生》的演出,仍不乏笑料,如有超人的古靈精怪打扮,但在導演陳嘉上刻意調校下,角色明顯較以往沉實,兼且有不少內心戲。故事講述Ronald本是個花花公子,加上為人性急,每件事必在三分鐘內解決,後來發現自己有一個患絕症的兒子,開始學懂珍惜親人。
Ronald對於這次嘗試充滿信心,日前他接受訪問時說:「其實我都唔係搞笑出身,要培養情緒雖然唔係好熟練,但係都做過,好似之前拍好多MV都好深情㗎。我都想試多啲唔同類型嘅戲,呢個只係第一步。今次係有好笑位,但唔會離譜。」
破禁穿短袖T恤
陳嘉上則稱讚Ronald:「佢對住個鏡頭唔會驚,好放,佢可以當鏡頭唔存在,真係天生食呢行飯。」
另外,Ronald在其中一幕戲中,再次穿上短袖T恤,不過卻看不到傳聞中他為蔡卓妍紋的愛的紋身,問Ronald為何在戲中「解禁」,他笑笑口說:「因為好熱吖嘛!我都話咗唔會唔着短袖㗎啦!」追問Ronald會否在大庭廣眾下再穿短袖衫,在旁的陳嘉上即笑笑口為他解圍說:「佢個身太薄,太瘦喇!着短袖衫差啲就見佢唔到。」
採訪:王連連
攝影:陳順禎