合皮塊地:捧主持大獎思潮暴發晒墨水

合皮塊地:捧主持大獎思潮暴發晒墨水

首次見面,當然要招呼先行,你好!小弟森美,中文大學傳理系畢業之後,已經好耐冇寫字,唯一執筆都係寫每日節目講稿,所以獻醜不如藏拙,以下洋洋成千字全部以口語書寫,以免成篇文章我寫唔通你睇唔明,為乜?
剛剛得到無綫最佳節目主持,突然有感而發想同你分享,我係一個對任何事都會有感而發嘅濫情人,食完碗好雲吞麵都會吟句詩對句對,然後先呼口胃氣出去。你可以話我壓根兒係梁朝偉嗰類人。你呼吸空氣;我咀嚼生命。你用食物充飢,我用情感代替空氣。淨係呢幾句你就知我真係有墨水啦。所以攞獎咁大件事,就已經令我思潮如山洪暴發一發不可收拾。

三姑六婆跌眼鏡

先講心情真係好意外,試問有邊個冇聽過一個無記攞獎鐵論,就係「唔到冇獎攞」,呢句規條彷彿喺某一期《TVB周刊》登過,六叔聯同香港小姐喺新年團拜講過一樣,因此身邊所有三姑六婆知道我要做節目不能出席頒獎禮,都報以一句「實唔會畀個獎你啦!」三姑六婆叫你入邊隻股票你唔好信,但係娛樂事佢哋係專家,佢哋知霆鋒結婚,分分鐘比拉姑早,話佘詩曼攞獎仲肯定過陳志雲,我有乜辦法唔打定輸數?但係結果竟然令大家跌眼鏡,唔出席頒獎禮都有獎攞,嘩!嗰份嚇死人真係勁過一架來勢洶洶嘅開倒車大貨車。三姑六婆只好冷冷咁講一句:「今時唔同往日。」
無記的確唔同,唔好話頒獎畀一個唔出席嘅所謂「街外人」(註:我其實有約,係自己人,湖南電視台訪問係要講普通話㗎,不過我講嘅普通話唔普通好特別,特別難聽)。近期一個TVbeople(編註:無綫新口號,即TVB加people)嘅宣傳片就夠潮爆,短片用上黑沉圖案唔鮮唔艷,已經夠破格,仲要唔知佢想做乜嘢,你估做宣傳做到唔知你想做乜嘢宣傳咁易做㗎?呢種膽量真係估唔到喺無記見到,結果引得一眾潮人再次開眼睇電視,紛紛議論仲有創新用語,將TVbeople呢個字等同潮人,話人唔啱傾唔潮就會淡淡咁講:「你都唔係TVbeople嚟嘅!」你聽過未?未聽過都唔好咁大聲認。再加上一個位高權重嘅高層會同你做個飯局,呢種創新真係拍得住百萬富翁Trump同你做個《飛黃騰達》真人騷。

細路見我陰陰笑

講到呢度,我都要自己問自己一句,我係唔係收人獎所以講好說話呀?我答自己:「唔係!」好,繼續。無記真係不知不覺變緊,喺呢幾年有瞄頭節目愈來愈多,宣傳片更加要讚完再讚,用上大量有心機電腦特技,令無記節目人未到聲先到,先聲奪人是近年各商品市場策劃必用招數,用潮做包裝紙更加不可缺少,兩種手法都喺無記見到,可以肯定無記銳意進取。當然我對當中管理層認識淺,不敢亂講邊個應該戴頂高帽,但肯定有人要為此事負責,更應受我小弟一聲感謝,若果唔係我呢種「有獎唔去攞」嘅小子又點會咁梳乎有嚿足金獎座看門口呀?
要抽出恩人畀我當面致謝仲有一個,我得獎當晚漏咗多謝嘅商業電台其中一舵手甘菁菁,佢原本係出名經理人,入主商台之後輕描淡寫就將電台節目主持明星化,短短幾年,就將我同小儀搞入無記擔旗做節目主持,令我哋知名度大大提升同時擴大聽眾層面,以往聽我以年輕人居多,將我搬入公仔箱之後,嘩!我𠵱家出街成個譚玉英加歐陽震華混合體,細路見到我個個陰陰笑,太太見我個個眼甘甘。呢種吸引力就算我再努力都唔可以咁短時間做到,所以呢一步對電台聽眾吸納上係一個大成功。

唔係爛泥扶上壁

再講,你話我真係叻咩,連我自己都唔信,但係《15/16》有人睇原因係乜呀?我可以答你係因為我喺電台儲落嘅錢,可以喺電視台度用。點解電台儲嘅錢喺電視都用得?因為電台影響力仲好大,仲可以郁到年輕人生活習慣,改變到一班黃毛潮民嘅想法,我只係受惠其中嘅幸運星,當然再加上少少努力啦!哈!你以為我唔做事白收人工㗎?不過點解我可以成為幸運兒,都全賴搞我入公仔箱嘅決策人甘菁菁小姐。
一個機構故步自封點會有進步,兩個傳媒巨人相互合作銳意改變就爛泥都可扶上壁。我當然唔係爛泥,我冇咁謙虛,但我做電視節目做到得獎就肯定係背後黑手善意造成。
Textby森美
合皮塊地專欄逢星期五刊出

唔出席頒獎禮都有獎攞,嘩!嗰份嚇死人真係勁過一架來勢洶洶嘅開倒車大貨車。
電視圖片

試問有邊個冇聽過一個無記攞獎鐵論,就係「唔到冇獎攞」。
陳奕迅

森美簡介
開口主持電台節目,再轉戰無綫game騷,現動筆寫文字專欄,《萬千星輝頒獎典禮2006》最佳節目主持得主。