啱啱喺周三完成嘅國際友賽同歐國外賽事，雖然入球數字唔係話咁高，但係喺英超聯角逐嘅球星就認真威盡，當中超過10個球員喺周中有「士哥」。不其然令我求大俠想起，外間經常談論英超聯係4大聯賽入面最高水準嘅聯賽。
雷丁奇雲杜里都有份
周三有份入波嘅英超球員包括車路士杜奧巴及波歷克、阿仙奴亨利及希比、曼聯基斯坦奴朗拿度、朗尼同尼曼查維廸、韋斯咸班拿約，以及阿士東維拉巴路士等等。至於熱刺前鋒羅比堅尼就最威，佢大演帽子戲法幫愛爾蘭大炒聖馬力諾5:0，連打緊雷丁嘅奇雲杜里都有份數糊，今次國際賽仲唔係「英超聯」玩晒？
講開車路士，杜奧巴呢期真係「弗」到冇人有，堪稱現時歐洲腳風最順嘅前鋒；周三科特廸瓦友賽贏瑞典1:0，就係靠杜奧巴上半場一箭定江山，仲幫埋捧場客開咗個勁落飛嘅上盤。
不過，車仔周六聯賽將迎戰韋斯咸，如球迷仲想追捧佢哋真係要諗諗，事關車仔國腳甚多，好似林柏特、艾辛、泰利同祖高爾等，差唔多成隊波都有份踢周中國際賽，會唔會變腳軟蟹自己度度啦！
「我求大俠喺度有個建議，如果球迷喺周六堅持要捧車路士嘅話，最好轉玩『首球』買舒夫真高；因為車仔成隊正選得佢一個唔使踢周中國際賽咋嘛。」