火箭啱啱輸畀馬刺，姚明力挑鄧肯不成，暫時做唔到頭號中鋒都唔緊要，因為開季至今佢已經打低過奧尼爾一次。既然NBA開季冇耐已經打得火熱，XB360都要湊湊熱鬧，近期出咗隻籃球大作《2K7》。不過希望呢隻名牌籃球遊戲，今勻第7集冇搵錯未在狀態嘅奧尼爾做代言人；仲有樣嘢更加諷刺，喺遊戲罰球練習模式入面，罰球出名差嘅奧尼爾仲會幫你做執波仔，你話係咪笑到碌地先！
記者：陸俊雄
巨無霸學住執波先
《2K7》射罰球嘅難度超高，要用右控桿嚟控制投球力度，拉後儲力，放桿就等於投球。加上依足球員真實能力，奧尼爾呢類罰球出名差嘅中鋒，對手明用「犯規戰術」，要佢射罰球輸都輸死。玩家只要進入罰球練習模式，選擇上屆總冠軍熱火，你就會發現巨無霸身處籃底。無論你係罰球一嘢穿針，還是彈到老遠，奧尼爾都會四出幫你執波。咁過癮嘅情況何止發生喺奧尼爾身上，其實當你揀火箭隊嘅話，連姚明都會榮升做執波仔；揀馬刺嘅時候，中鋒鄧肯當然一樣逃唔過呢一劫啦！可謂玩盡NBA幾大中鋒。
街波形式夠真實
Game迷話，NBA遊戲中，現場氣氛做得最好一定係2K系列。筆者呢類玩勻晒NBALive同2K嘅籃球遊戲Fans，當然認同呢種講法。不過喺今集《2K7》中，吸引筆者留意嘅，再唔係有晒Fans、短裙靚Dancer助興嘅室內場大戰，因為同《2K6》比較變化唔算好大。令人驚喜反而係打街波，即是平日路過街邊球場，3打3嗰種。玩家可以喺眾多NBA巨星入面，任選3件出嚟打盡街場無敵手。筆者個人就喜歡火箭孖寶：姚明、麥基廸，再加活塞比立斯嘅組合，勝在姚明射波係座地炮唔會跳，而麥基廸狀態不穩嘅話，都有能攻善守嘅比立斯補上。玩家唔鍾意3打3，仲可以改為2打2或者單打獨鬥，相信重演姚明大戰奧尼爾都幾精采㗎！
巨人混戰大特寫
換對Nike再拼過
有時候覺得2K系列都幾似足球名作《WE》，兩者動作流暢、仿真度高唔使多講，同樣有聯賽、主場之利、球員買賣、疲勞度、可以自創球員育成，仲可以幫佢哋改頭換面，連對波鞋都可以換埋，呢啲元素先令到運動Game長做長有。喺《2K7》，想自創一個比奧尼爾更巨嘅中鋒唔難，更可以幫佢穿對Nike，AirForce、AirMax等，大把款式俾你揀。雖然換鞋係幾過癮，不過筆者覺得稍為美中不足係只得Nike，而且未見有Jordon系列。如果有埋經典Jordon籃球鞋，穿咗實行Jordon上身係咁「飛Away」。
實試後感
由於賽季有成八十幾場賽事，筆者未爆機都好正常，可能仲有好多隱藏波鞋未發掘到，如果有埋adidas咁就更加好。另外，事關佢對球員能力、動作嘅模仿太過真實，即是AI做得過份地好，面對啲強到射損手嘅勁人如湖人高比仔、熱火韋特、騎士嘅勒邦占士等，隨時俾電腦大炒二十分都唔出奇。不過，點解奧尼爾瘦咗咁多嘅？唔通做代言人要靚仔啲？
PROFILE
開發商：2KGames
平台：XBOX360
類型：籃球 遊戲人數：1-4人
（可透過XboxLive上網，進行最多8人網絡對戰。）
系統支援：杜比5.1數碼音效
行貨售價：$299
