摷袋兵團又再出擊，今勻喺Sogo附近一帶四處摷袋。事前諗住睇睇港女鍾意用邊個牌子DC，點知答案係Nokia、Motorola等。你冇聽錯，筆者亦冇搞錯，呢類手機牌子確係冇出DC，不過事實係港女覺得手機都有影相功能，咁買DC嚟做乜？既然問咩冇咩，咁就打蛇隨棍上聽吓佢哋點講。
先嚟呢位陳小姐，問佢有冇DC，居然拎部Nokia62803G電話出嚟，反問筆者算唔算。佢好似好有見地咁話：「我又唔係相機發燒友，手機有個鏡頭仔可以影吓咪夠囉！𠵱家手機影相、聽歌、睇片乜都得，仲邊有人另外再花錢買DC或者MP3機。」
其實摷袋當日，唔少受訪者都有類似答案，咁講啲白色、粉紅色專攻女性市場嘅卡片DC，可以預備摺埋都得。做男友醒目啲啦！諗住買DC做禮物嘅話，不如送部手機。
至於另一位原小姐，當筆者表明來意後，佢斬釘截鐵咁答：「我唔用DC喎！」正諗住佢會揮袖而去之際，佢喺袋度摷部其貌不揚嘅摩記E680i出嚟，話都影到相。E680i唔算新，問佢有冇打算換手機或者買DC，佢反過來Sell手上部機有幾好用；影相、聽歌、有手寫輸入，總之一句講晒，功能齊全佢好滿意。好似原小姐呢類求實際嘅港女係好㗎！始終講緊嘅係幾千蚊部科技產品，賣相幾好勢係假，功能夠多先最緊要。
記者：陸俊雄
