現年41歲嘅郭富城同26歲嘅名模熊黛林，因為拍廣告一吻撻着，城城日前揸住價值約210萬嘅平治媾女戰車接熊黛林，點知俾狗仔隊撞破好事，熊黛林雖然半隻腳上咗車都縮番，認真冇癮。
影合照定情
熊黛林同天王城城撻着之後，當堂聲價十倍，佢前晚喺西港城出席完活動後，行返上環宿舍，雖然只係五分鐘路程，但就有兩名男工作人員分別負責擔遮同開路，另一名女職員就貼身護航，似足女王出巡。當時追訪記者超過10名，唔怪得佢同女職員蹺手而行時，見到場面咁熱鬧都忍唔住偷笑。
至於另一主角城城日前去咗上海宣傳唱片，大受女歌迷歡迎，佢之後又抱住一隻貓咪，大讚佢係「上海美女」，心情簡直靚到爆。
林曉峰噚日喺商台節目度踢爆「富黛戀」早有迹可尋，佢話：「佢哋第一次同台係手提電話活動，當時我做司儀，見佢哋眉來眼去，熊黛林仲喺後台主動同城城合照，城城見到佢『嘩』一聲。因為佢太高，兩人仲影得非常親密吓，無限風光喺後台，畫面仲好靚，嗰時一個含情脈脈，城城就風度翩翩，兩個四目交投，我仲見到小美緊張到撥晒頭髮㖭。」
唔介意身高
此外，熊黛林噚日着住低V晚裝出席海運大廈亮燈活動。對於林曉峰爆熊黛林搵城城合照好親密，熊黛林話：「沒有甚麼親密不親密，合照都是兩個人。」問城城有冇約佢聖誕一齊過，佢話對方忙，唔想耽誤佢。有人問佢介唔介意男朋友比自己矮，熊黛林就話：「感覺最重要！」
