陳奕迅（Eason）父親陳裘大日前因貪污罪成被判監6年，兼要交出110萬元賄款，父子情深的Eason正與律師研究會否上訴。為應付昂貴的訴訟費用，Eason決心努力搵錢，他已接下一套與楊千嬅合作的愛情喜劇，飾演賣魚仔，預計明年初開工。
陳奕迅這年來一直努力賺錢，為其父陳裘大的貪污案重審準備一筆律師費，據悉為了父親的官司，前前後後已花掉超過500萬的律師費，但他從未為此感到肉痛，反而更積極搵錢準備隨時上訴。出名孝順的Eason一直擔心父親健康，縱使聽了法庭判詞，但心裏還是不忍看到患病的父親受牢獄之苦。
歡喜寃家
與千嬅譜街市奇緣
英皇出任Eason經理人期間，見對方即將約滿，於是臨尾搵一筆，狂為他接戲，弄得他身心皆疲，自去年初拍完與容祖兒合作的《神經俠侶》後，Eason曾公開表示不喜歡拍戲，只喜歡唱歌，直至離開英皇轉投陳家瑛門下，其工作安排才較恰當，有足夠休息時間，他對演戲又提起了興趣，加上片酬身價又高了，拍一部戲150萬元片酬，最近他又開始洽談片約。
據悉，Eason明年初會接演一部寰亞公司投資、杜琪峯監製、羅永昌執導的愛情喜劇片，女主角屬意由楊千嬅擔任。這套新片是Eason和千嬅繼02年的《慳錢家族》後再度合作，戲中兩人飾演街市的賣魚販，由寃家變成情侶，男方愛安於現狀做賣魚仔，但女方卻不甘心，誓要走出街市。
為了準備彈藥，隨時為父上訴及應付龐大律師費，Eason除了會接電影演出外，還會出唱片、拍廣告和登台。陳家瑛昨日證實曾與寰亞洽談合作，她接受電話訪問說：「寰亞係有一部愛情戲想搵Eason拍，但𠵱家仲未簽約，至於女主角係邊個，最好問番寰亞啦。其實呢幾個月都有好幾部戲想搵佢做，但佢真係好忙，所以要小心揀，呢輪除咗要為廣東唱片做宣傳外，仲要抽時間錄國語碟，所以拍戲都要度清楚啲期。」問到Eason是否要努力搵錢為父上訴？陳家瑛說：「呢啲係佢嘅家事，我唔方便評論。」
打友誼波
踢10分鐘氣喘
雖然備受父親入獄事件困擾，但Eason昨天仍冒雨參與明星足球隊的每周聯誼賽，與李克勤、許志安和黃日華等齊齊落場踢波解煩憂。Eason在昨午3時多駕駛Audi旅行車離開大坑寓所前往順利邨球場，現場所見，Eason、克勤和黃日華等同隊，許志安和羅家英等則被編入另一隊。司職前鋒的Eason換上背心及短褲上陣，但他落場約10分鐘已經攰得氣喘如牛，時而低頭喘氣、時而踎在一角用手遮面。
錯失機會
臨門撻Q扮碌地沙
稍為回氣後，Eason再次落場，其間踢中場的克勤傳波給Eason，豈料企正龍門口等執死雞的Eason居然撻Q射空氣，但他卻搞笑地借勢撻低扮碌地，其他隊員見狀即攙扶他起身，Eason此時終於展現真心笑容，拍拍隊友肩頭繼續作賽。
至4時多球賽結束，Eason一隊以5比4勝出，但其時已十分大雨，眾人匆匆執拾物件到更衣室沖身。Eason離開時，記者上前問他會否探望父親、是否覺得父親被判刑期長及有否考慮再上訴等問題時，他低頭輕咳兩聲後說：「今日唔講呢啲嘢啦。」接着便由司機開車載他離開。
此外，Eason本月21日將擔任「麥當勞世界兒童日2006音樂會」表演嘉賓，當日他會以歌唱老師身份，向參與比賽的小朋友分享演出心得。
採訪、攝影：葉雪、娛樂突發組
