至於德甲聯，一樣着紅衫嘅拜仁慕尼黑同英超利物浦及意甲AC米蘭一樣咁唔掂，今個禮拜六佢哋迎戰青春無敵嘅史特加，真係要踢爭氣波至得。
頹勢拜仁慘遇榜首隊
史特加喺今屆德甲真係「弗」到你唔信，自9月中開始喺聯賽未輸過，當中包括作客雲達不來梅喺落後兩粒下反勝3:2，以及喺主場以3:0大炒史浩克04，𠵱家仲以24分排榜首。佢哋攞到咁好成績，隊中班𡃁仔真係居功至偉，其中近9場聯賽入咗7球嘅馬里奧高美斯更被教練華亞捧到天上有地下無，仲話德軍教練路維唔提升呢位21歲小將做大國腳，就係德國國家隊嘅損失。
相反拜仁喺今屆德甲就唔多掂，踢咗約莫三分一就輸咗4場，其中喺上場主場聯賽仲輸畀漢諾威，俾對方爆咗個11倍冷W；若然呢場對史特加有乜冬瓜豆腐，睇嚟佢哋教練馬加夫應該開始有壓力，話唔埋仲聞到少少魷魚香㖭！