賭王何鴻燊老當益壯，70歲仲添丁，真係有心有力。燊哥噚日出席捐款畀中大嘅儀式時揭秘，話養生之道係做個「灰姑娘」。
童話故事中嘅灰姑娘，半夜12點一定要返屋企，其實燊哥係想講要長命健康，最緊要早睡早起，唔好捱天光，呢啲老生常談嘅道理，出自佢把口就精采好多，唔怪得可以吸引四個女人做佢太太。燊哥又話，人哋講防人之心不可無，佢就相信防病之心不可無，尤其係經過沙士一疫後，佢更加關注呢一點，所以捐錢2,500萬元畀中大做呢方面工作。
噚日個儀式有一件小插曲，就係中大校長劉遵義講燊哥捐款額時，吞咗個萬字，令捐款金額相差十萬八千里，連佢自己都忍唔住笑。