要尋找快樂其實好簡單，只要大擦一餐意大利Tuscany菜便可，因為烹調菜式嘅整個過程都符合意大利人的生活宗旨：簡單同快樂。菜單上並冇甚麼矜貴皇室用料，亦冇刁鑽的煮法，一切都以簡單至上。專程從Tuscany來港宣揚呢種快樂「煮意」嘅一班酒店廚師同經理，個個煮餸時都不忘搞笑做鬼臉，其實食嘢要食得開心先係最重要！
記者：黃家雯
攝影：伍慶泉
Tuscany菜的來源
意大利Tuscany菜的歷史源遠流長，當年居住在Tuscany一帶的人正是羅馬帝國時期的盛大民族Etryscans的後人，呢個民族向來識飲識食，Tuscany人正正得到佢哋嘅真傳。據說，當年有一位叫Caterinade'Mediic的Tuscany少女嫁到法國成為皇后，於是將Tuscany人的烹調技巧傳到法國皇宮，慢慢演變成今日的法國菜。最近本地餐廳虞家媽媽與來自Tuscany的Locandadell'Angelo酒店搞Crossover，由即日起至12月3日，喺餐廳的西餐區推廣Tuscany菜。
快樂煮快樂食
今次虞家媽媽誠邀Locandadell'Angelo酒店的成員來港烹調地道Tuscany菜，佢哋幾位成員包括老闆Stefano、經理Claudio及兩位大廚Lara同Matteo全程笑容滿面，仲會講笑擺Pose，每個動作猶如由身上搞笑細胞所帶動，充滿幽默感，佢哋話：「意大利人最識享受人生，連工作都係一種享受，今次Tuscany菜都希望客人抱住快樂的心情去進食同享受。」酒店老闆Stefano亦非常興奮：「我哋Tuscany菜歷史悠久，可說是意大利菜的始祖，衍生成今日的法國菜，希望香港人知道意大利菜其實唔需要用好矜貴的材料入饌，最緊要食得開心同煮得開心。」嘩！突然以為自己拍緊《向世界出發》！
開心Tuscany成員
開始認識Tuscany菜
Tuscany位於意大利北部，海鮮款式不及南部豐富，不過愛食海鮮的程度絕不遜於他人，因此除咗大量肉類及野味之外，海鮮都係佢哋煮食的常見材料，加上本着開心的宗旨煮食，份量同快樂能量成正比，因而大部份菜式都較大堆頭，想食多幾款特別菜式，最好Call埋三五知己一齊嚟。
得意頭盤
凍肉拼盤（Tuscanhorsd'oevresselection）$138
拼盤上的Salume（莎樂美腸）從意大利空運到港，味道有點似鹹味較重的臘腸。最值得試的是野兔肝醬，用野兔肝臟製成，味道比鵝肝醬更濃，先是一陣羶味，後來一陣甘香。
海鮮蜆麵包湯（SeaClamsSoup）$128
其實這個不算是湯，因為麵包亦係主要材料，早已連同新鮮蜆肉一齊煮，令到整個湯質感都是杰身的，而味道及感覺好似海鮮味麵包布甸，幾得意。
快樂主菜
（左）古法煎紅衫魚配鮮番茄汁$138
所謂的古法即是將紅衫魚柳底面輪流慢煎，不會太油膩亦可封住魚汁，魚肉不易散，好味！
（右）古法海鮮湯（Caciucco）$188
海鮮湯的製作過程繁複及時間要拿揑得準，飲第一口已感到湯在口中滲出濃濃的海鮮味，浸湯煮過的紅衫魚沒有絲毫腥味。
番茄芝士意粉$148
只睇菜名，覺得一啲都唔吸引，不過愈平凡愈不簡單，以鮮番茄醬配Mozzarella芝士，慢火煮後鮮茄味包住煙韌的Mozzarella芝士，再配爽口意大利粉，簡簡單單正是原裝意大利風味。
Tuscany餃子（TuscanyDumplings）$78
雖說是餃子，但只有餃形，以三種芝士包括Ricotta、Parmessan及Mozzarella混合而成，口感夠黏，味道夠鹹，不過略嫌味道單調。
甜品火燒不太甜
意大利米餅（RiceCakeOnVanillaSauce）$48
呢道係Tuscany人的地道甜品，由於有蛋白同酒的成份，米餅配香料酒Sambuca經火燒後，外層變成一塊脆片，唔係太甜，亦啱晒不嗜甜品的朋友。
睇埋環境
搵食攻略
虞家媽媽（31183111）
地址：銅鑼灣利園二期地庫
意大利Tuscany菜式推廣時間：即日至12月3日
平均消費：$150-$200
交通：銅鑼灣地鐵站F出口
座位：約160個