每年無綫台慶頒獎禮舉行完畢之後，好快又輪到年尾一連串嘅音樂頒獎禮，不過近十年頒獎禮好似分豬肉咁，完全冇驚喜冇氣氛，相反93年四大天王加埋李克勤，於勁歌頒獎禮用揭啤牌形式爭最受歡迎男歌星獎，真係緊張刺激好多！
今年無綫台慶頒獎禮競爭都算激烈，單單誰是劇后已經爭崩頭。不過凌零發日前在YouTube網站中，看到一條標題「1993年十大勁歌金曲頒獎典禮：克勤跟四位天神玩揭咩牌」的短片，即時勾起連串回憶，這次最受歡迎男歌手的公布方式，絕對是多年來最深刻的一次。
93年是樂壇四大天王張學友、劉德華、黎明及郭富城的世界，當年勁歌頒獎禮舉行前夕，大家都議論紛紛，究竟哪一個天王會奪得最受歡迎男歌手獎，無綫見各界既然如此關注，於是就愈玩愈大，要幾位候選者即場揭啤牌玩21點睇結果。
克勤似湊數
當年頒獎禮由鄭丹瑞及鄭裕玲擔任司儀，哥哥張國榮出任頒獎嘉賓，大會首先開出五隻啤牌，要候選者李克勤、城城、學友、黎明和華仔五人輪流揭牌，似湊數性質的克勤率先爆煲，而城城也緊隨其後成為輸家，結果學友、黎明及華仔齊齊奪得20點，要再揭一隻大啤牌決生死。
華仔勁失望
華仔之前已經連續三年在勁歌金曲中稱王，奪獎呼聲極高，怎料他拿到K率先敗陣，失望之情表露無遺，而學友則再加4點爆煲，黎明成功得到煙士，合共以21點勝出！哥哥頒獎給黎明時，更笑笑口說：「你話要喺邊個手上攞呢個獎先？黎明我係咪話你有希望先！所以我話有志者事竟成！」
老實說，人人都知道頒獎禮一早有結果，怎會單單以揭啤牌玩21點如此兒戲！無綫絞盡腦汁公布結果，的而且確可以增加觀眾的官能刺激，不過凌零發忽發其想，如果當年無綫的道具人員不小心放錯牌的話，豈不是很牙煙？到時無綫明知頒錯都只好頂硬上了！
刺激爭獎實錄
網址： http://www.youtube.com/watch?v=F2maSk0ySCU
版主︰凌零發
