近期政府對本港嘅金銀貿易業務發展有好大支持，無怪乎金銀貿易場噚日舉行「成立九十六週年暨第四十屆理監事就職典禮」，財經事務及庫務局局長馬時亨都畀面出席，擔任主禮嘉賓。
馬局長喺發言時就話，有關喺機場附近成立金庫嘅事宜，相信喺幾個月內會有結果；同時，政府正研究豁免特定某啲黃金產品嘅過境關稅，相信亦好快有結果（港府全年徵收嘅黃金過境關稅約1000萬元）。不過，在場嘅金銀業界人士同埋嘉賓就唔多領情，掛住自己講嘢，結果台下嘅噪音差啲蓋過馬局長把聲，搞到佢都忍唔住要講句：「你哋靜吓先，等我講埋呢兩句！」
而新任金銀貿易場理事長李德麟喺會上致辭時話，今屆理事會將喺架構重組及集資計劃、機場金庫計劃、上海黃金交易所合作計劃，同商品期貨市場角色及定立四大方面努力工作。