美國總統喬治布殊話過，希望中國人唔好咁慳，要買多啲美國貨，幫助解決美國龐大嘅貿易赤字。反觀美國人猛咁買外國貨，令美國貿赤好驚人。喺《MSN》討論區，有人關注美國儲蓄率接近歷史低位，令當地經濟有隱憂。
網友Wolfram74估計，美國人未來5至10年會繼續洗腳唔抹腳。佢話，美國股市喺1995年至2000年大旺，樓市由2000年到今年又係咁升，呢啲「紙上富貴」令美國人夠膽魚翅撈飯。但未來幾年，隨着股市同樓市放緩，美國人可能要借好多錢，先至可以繼續大魚大肉。負債咁重，美國經濟恐怕會重演七十幾年前嘅「大蕭條」。
AmbrNrgl1話，佢男朋友係「大花筒」，經常周遊列國，從來唔儲蓄，亦冇為退休做打算，但生活得好寫意；因為人一世物一世，乜嘢都要享受吓，點解要儲蓄咁辛苦？SCSunshine回應說，𠵱家唔儲蓄，將來退休冇錢使，就要繼續為生活而奔波，咁樣仲慘。
不過，GreatArm反而擔心啲汽油咁貴，可能削弱美國人嘅消費意欲，令零售商無啖好食，到頭來會打擊經濟。
美國個人儲蓄率去年降到七十多年來最低水平，現時亦屬偏低，「環球透視」首席經濟師貝拉維什警告，儲蓄率不能長期這麼低，倘美國人突然削減開支，當地經濟恐怕會陷入衰退。