近日紅潮再次氾濫，引來瑞信董事總經理兼亞洲區首席經濟師陶冬喺佢個Blog發表咗「工行（1398）的220億美元與中移動（941）的42億美元」嘅一番感慨，指9年前中移動上市時，若果股份賣唔到9成畀美國人，就會胎死腹中，但今日集資多5倍以上嘅工行，仲未行出香港就已經超額認購幾倍，根本唔使去美國兜售，而且賣得仲貴過滙控（005），真係時代變咗咯。
被網友暱稱為「陶公」嘅佢話，響資金全球來、全球去之下，亞洲國家已由10年前嘅淨資金輸入國變成淨輸出國，加上中國本土資金大量參與中港股債市場，佢估工行新股就起碼有1/4俾中資、華資機構吸咗。呢兩個都係亞洲股市同債市近年出現結構性牛市，尤其H股得以飛漲嘅基本因素。
中資銀行罕為貴
對於「陶公」話工行賣得貴過滙控嘅感慨，網友「吹吹吹」認為，連最差嘅華夏銀行市盈率都超過20倍，市賬率2.5倍，相反，美國嘅銀行市盈率只得12倍，市賬率2倍，呢個完全係中國銀行泡沫喎。
「陶公」回覆「吹吹吹」時，認同佢講中資銀行唔可以收咗錢企響度，要快啲做機制改革，因為市場氣氛可以轉得好快，今日熱捧你，明日亦可以狂插你。
至於網友「tom新理財」就話，呢個應咗中國一句古諺，「物以罕為貴」。喺外國，好公司太多，所以定價低；響中國，好公司太少，想買嚟分享中國經濟成長嘅人太多，所以搶貴晒囉。又係喎。