話咗大成交跌市唔使驚，因為係先跌後反彈，昨日港股食住前日個勢，向上推進，雖然埋單計數先升9點，但係就有580億元成交同埋粒閃亮亮嘅「十字星」撐住，個市仲係反覆向上嘅格局。
美股喺高位徘徊，今個禮拜有好多重要數據，美股會好飄，不過，㗎仔個市就開始造番好啲，如果個勢keep住，有機會反覆升多500點，上試16800，對港股炒上嘅氣氛好有利。
𠵱家港股嘅成交咁大，表面睇就係好淡大惡鬥，但由兩個月前睇到呢刻，好友仍有優勢，淡友昨日好似想搵隻滙控（005）嚟質低個市，但係滙控嘅支持位好近，要質得深唔容易，事實上，一隻滙控好難拖低個市，仲要睇其他大藍籌嘅表現，睇嚟睇去，𠵱家仍然係造好着數啲。
港交所（388）公布嘅季度業績唔曳，昨日企喺65.75元收市，升0.5%，仲未發力，今日應該會炒上去，隻C輪3682昨收90仙，升4.6%，牛刀小試，跟番昨日嘅建議嚟炒，應該會有唔錯嘅斬獲。
工行C輪9909：日前介紹大家上車買工行C輪，原因係睇到啲大戶想砌工行（1398）上去，無他，上市後嘅低位收集已完成，就係開車嘅時候，睇吓啲買盤係咁掃，單日成交56.3億元，佔咗大市成交成10%，幾勁！啱啱開車，點會咁快煞掣？應該好快破4元，直踩上4.35元，有貨繼續揸，唔夠貨就加碼，冇貨可以揸番啲C輪，隻9909槓桿率5.2倍（有效5倍），正股升上4.35元，9909應該喺1.20元嗰頭，正股跌穿3.70元止蝕。另一隻C輪4449，昨收42仙，引伸波幅較高，都可以諗，有效槓桿率6.2倍，正股升上4.35元，4449應該喺75仙樓上。
俊樺