港股再創收市新高，中資金融股尤其瘋狂，光大控股（165）調整完1日再上，升多4.7%，建行（939）、工行（1398）唔使講自然係市場焦點所在，連帶同國內銀行有關連嘅閩信（222）都升14%，似乎凡係同中資金融股有關，都好易引起市場注意。
呢種旺市，同市場資金氾濫有關，其實早排滙豐銀行帶頭減息，已經係一個訊號講畀大家知，游資短期內都唔會撤出香港。事實上，有人講緊早排認購工行嘅資金，會投入下月十幾隻新股身上。除咗兩隻大嘢中國交通建設及中煤能源之外，市傳仲有中信銀行、興業銀行同埋上海銀行排隊等住上市。
中信銀行上到市，中信國金（183）最受惠。至於興業銀行，無論以淨A股或A+H股成功上市，持有呢間銀行約16%股權的恒生銀行（011）最受惠，而招商局中國基金（133）只持有2.1%。
噚日翻查資料，原來國壽（2628）母公司於8月曾以3.9億元人民幣購入興業銀行1.75%權益，作價只係1.85倍P/B。恒生所持興業銀行以1.85倍P/B計，估值已達35.6億元，而興業上市後會再升值。恒生呢隻本地薑銀行股，近個零星期升幅頗為不尋常，隨時有機會跑出都唔定。
深圳科技（106）噚日急升44%，市值由4億幾暴增至6.2億銀，佢本身係深圳國際（152）聯營公司，公司今年上半年業績續見虧損，蝕7486萬蚊，較去年同期虧損擴大，而早前集資後，現持有現金1.65億銀兼無負債，噚日失驚無神炒起，且看仲有無動作跟尾。
歐陽風