8號仔最架勢係乜？唔係小小超引以為傲嘅now，亦唔係班年薪動輒過千萬嘅管理層，而係律師多！有乜好處？就係可以用法律「大」番監管機構！最近，區文浩為首嘅電管局搞個FMC滙流諮詢，因為響取消互連費呢一部份着墨太多，令到業界以為佢哋假諮詢，有晒結論，於是又俾可能會因此唔見幾億嘅8號仔將軍，入稟高院司法覆核佢哋嘅諮詢。
不過，文浩仔又好鬼死有型，除咗即刻撰文還拖，仲兼夾搵位落番8號仔面！話說先排九記（即係九倉電訊）嘈8號仔唔肯履行網絡互連責任，向佢哋旗下寬頻電話商ZONE提供互連，咁兩間公司後尾其實都傾掂數。
之但係，文浩仔仍然即刻整個「指令」畀8號仔嘆吓，要佢駁畀九記（最後限期係噚日），點數贏番一次！權威人士話，電管局同8號仔交手過N次，難得嘅係文浩仔勁有腰骨，不畏惡勢力，之不過咁，佢明年中都食長糧，而8號仔呢次覆核有排搞，所以屆時佢老人家好有可能要帶住單官司退休，都叫係有啲遺憾㗎！