十元八塊冇乜好嘢食？錯晒！某日行過鴨寮街，老街坊指我去新香園歎下午茶，叫我必食嗰度個蛋牛治；上枱時見佢咁大碟已經相當過份，擺埋入口先知，佢仲係用新鮮牛肉做㗎，惹味程度，同一般罐頭貨色冇得比！
靜靜雞扮去廁所走入廚房！牛肉係先用熱鑊爆香，再下蛋汁輕拌做成；再望吓隔籬枱，睇住佢咬一啖後啲肉汁、蛋汁從指縫間漏出，有冇大嘥啲呀！雖則見佢已經用條脷「作出補救」，食得一臉狼狽相，不過我都係唔可以寬恕佢嘅「罪過」；喺度提吓大家！有心去食，記得要新鮮麵包。
再望吓佢個水牌，呢度竟然仲有生滾豬膶麵（$15）、生灼豬雜麵（$17）同南乳豬手麵（$10），呢啲咁嘅老派粥麵，真係有一種久違了的老朋友感覺，可惜現實是肚已飽了大半，惟有同佢約誓再戰！
新香園（23862748）
地址：深水埗桂林街38A（近鴨寮街）