娛樂圈近日喜事重重，結婚生仔的藝人一大堆，繼袁詠儀於周日為張智霖誕下麟兒後，吳家樂愛妻周蕙蕙前日黃昏也產下寶貝女，家樂仔開心得見人就報喜，又不停接受祝福，他表示全程陪伴老婆生產，手忙腳亂又感動落淚，他還搞笑謂女兒樣貌像蠟筆小新，初為人父的喜悅全寫在臉上。
吳家樂日前才公開表示妻子周蕙蕙的預產期在月底，結果他前日已榮升做老竇，其女兒前日黃昏在山頂嘉諾撒醫院出世，周蕙蕙自然順產，母女平安，新生女兒重七磅二安士。近期正拍攝無綫新劇《爛賭義當老婆》的家樂仔前日馬上向監製李添勝請假陪伴太太進入產房生仔，一直到昨午才離開醫院，到將軍澳電視廣播城錄影遊戲節目《15/16》。
逢人報喜
昨日家樂仔難掩初為人父的喜悅，電視城內的台前幕後人員都不斷向他道賀，只見他不停笑着回應：「係呀，噚晚（即前晚）生咗啦！」路過的馬國明原本欲問他錄影哪個節目，家樂仔未待馬國明發問完畢竟然又說：「係呀，噚晚生咗啦！」場面有趣。
家樂仔接受訪問時，笑容滿面表示太太原定預產期為12月初，現比預期早產了兩星期，他昨日說：「老婆前晚（即周一晚）開始陣痛，噚日朝早我打電話返公司請假，佢痛足16個鐘，終於喺黃昏順產生咗囡囡。之前我有同佢一齊上產前課程，入到產房不斷喺佢身邊鼓勵佢，其間我不停要幫手㩒住佢手腳，因為佢有啲抽筋嘅情況出現，又要揸機影低個過程，仲邊有可能有時間驚吖，總之就手忙腳亂啦！」
感動流淚
家樂仔又透露目睹女兒出世的一刻，夫婦二人都忍不住感動得流下淚來，他說：「嗰刻嘅心情真係好激動，覺得老婆真係好辛苦，但係佢真係好堅強，好忍得痛，𠵱家會餵人奶。我都唔知囡囡似邊個，我抱起佢見佢頭側側，好似蠟筆小新咁嘅樣囉，但係又手長腳長。BB嘅婆婆全程喺產房外等佢出世，一出世公公、爺爺同嫲嫲都即刻嚟睇佢。」
昨日四時許，周蕙蕙母親由司機接載到達醫院，她滿臉笑容接受記者恭喜，不停說多謝，逗留一小時後，周太離開醫院，她接受訪問說：「係生咗個女，家樂仔要返工，遲啲會再嚟。」問到BB似父親還是母親？周太謂：「咁細個，冇咁快睇得出。」
採訪、攝影：卓美娟、張俊銘
