牛仔總統「反恐」洗腳唔抹腳，搞到美國經常性財赤佔GDP嘅7%，最近嘅賣樓數據又唔係咁靚，全球經濟會唔會受到拖累暫時未知，但美金持續疲弱，又飄忽不定，就係鐵一般嘅事實。美國財長保爾森如果諗唔到計仔解決嘅話，華華建議佢誠心請教吓克林頓時代嘅財政部揸弗人，亦即係現任花旗集團執行委員會嘅主席魯賓，話晒當年佢成功創造美國史無前例嘅繁榮盛世，扭轉30幾年來一直見紅盤數，仲有盈餘袋落袋。布殊第一年上場即變赤字，敗家到不得了，仲搞到山姆大叔喺全世界冇乜朋友，人見人憎咁。
魯賓噚日威威咁到訪香港時就話，雖然美元唔算強，但點都係自己老家，始終會揸多過其他貨幣嘅。佢又話，如果計從政多年遇過最出色嘅政治家嚟講，鐵面總理朱鎔基同新加坡之父李光耀一定上榜，但排頭位就係老友克林頓喎。講開又講，克仔太座希拉莉選08總統嘅身影愈嚟愈起眼，記者問魯賓如果屆時獲邀重出江湖嘅話，會唔會「落叠」，魯賓只係話「時間太長遠」，𠵱家忙到飛起，冇乜私人時間，唔會諗咁多，但起碼冇sayno，擺明留有後着。