避風塘炒蟹好多人都識整，但講到最「正宗」、做到同一哥鮑魚齊名，就只有銅鑼灣喜記嘅喜叔；「我有一樣唔係咁多人知嘅第一！就係480次被捉無牌小販嘅香港紀錄！」最近喜記新舖開張，正正喺當年街邊賣炒蟹之舊地！新舖新菜牌，避風塘竟然可以同和牛、芝士焗龍蝦、凍豆腐Crossover！對住呢位幾十歲老人家，真係一次又一次估佢唔到！
記者：朱崇德 攝影：陳盛臣、伍慶泉
煮咗幾十年蟹嘅喜叔話：「避風塘炒蟹係香港獨有Fusion菜！香港係一個天然避風港，每逢打風落雨東南亞漁民就會喺度聚首一堂，大家交流煮食心得，就創製了避風塘炒蟹，當中最明顯者，是集合了越南、泰國及馬拉的香辣、味重風味！」
避風塘炒蟹原是貴人菜
不過大家估唔到嘅係早年避風塘炒蟹並非現在的平民菜式：「早年嘅避風塘，係一個有舞小姐陪聽曲、邊遊船河、邊飲邊食嘅銷金窩！70年代初玩上一晚，閒閒哋都要使上千元（當時人均月薪只是百餘元）！當時只有5間艇仔檔有做避風塘炒蟹，分別為漢記、妹記、九仔、匙仔同埋我『牛仔/喜記』；但時至今日仍有做避風塘炒蟹嘅，就只得番我哋一間喜記！」
被拉480次創香港紀錄
「不過70年代末，一場避風塘大火，政府立心取替夜生活式避風塘；喺80年代初，終迫於情勢上岸做無牌熟食，一做就係17年，其間先後俾人捉過480次，係香港俾人捉無牌小販嘅最高紀錄，而罰款由$500至$2,000不等！」咁計落條數喺銅鑼灣買個舖都夠？「所以𠵱家咪罰到冇晒錢囉！」喜叔仲笑話：「當年上堂見官，最後會問你『有乜意見？求唔求情？』，如果罰到賠唔起，就要同佢呻自己有幾慘，咁就有機會罰少啲！」
炒蟹炒到攞藍帶
喜記直至97年正式在銅鑼灣上舖，馬上變為星級食店，大家熟識嘅肥姐、Eason、蔡瀾、國務院副總理吳儀，都曾經係佢嘅座上客，就連海逸酒店行政總廚容沛光，都有叫喜叔嘅避風塘炒蟹外賣！不過講到最厲害，都係02年繼楊貫一之後，成香港第二人獲得「法國藍帶獎」，當年有法國美食家落到喜叔間舖食炒蟹，個個都話正，結果就畀個藍帶?佢。之後仲獲法國國際廚皇美食會頒發「喜記避風塘炒辣蟹全球之最」，好厲害呀！
避風塘炒辣蟹$250（約斤半）
以越南入口A5最頂級的大蟹做菜，鮮美已經毌庸置疑！輕拍蟹身，令避風塘料的蟹油蒜茸香味入至蟹身；隨碟的避風塘料超多！係入味成功的一大原因，不過炒得夠亁爽，滴油不沾，亦係成功另一原因。據知好多人食完呢味餸，都會將食剩嘅避風塘料打包，攞返屋企炒肉、蒸勝瓜，鮮味到你唔信！
避風塘凍豆腐$40
雪凍嘅豆腐仍保持軟滑真難得！豆腐味清，加入避風塘料，入口充滿蟹油香氣，感覺平淡中有點變化。
避風塘滷水鮑魚$30/1隻
將鮑魚放入滾起的滷水汁中，熄火浸足一日，上枱前放上避風塘料，剛剛熟仲保留到鮑魚鮮味。
避風塘炒和牛$250
以最上等澳洲和牛稍稍煎熟底面（約5成熟），再加入避風料快炒，咬至肉心，肉汁及肥牛油脂口內四溢！
避風塘芝士焗龍蝦$300/斤
芝士焗龍蝦加入避風塘料，當中嘅金蒜添香、蟹油倍增龍蝦的鮮美！打破傳統加入辣味，食落冇咁肥膩。
喜叔教你喺屋企炒辣蟹
喜叔解釋，其實佢所用嘅避風塘蒜茸，其實是以上百斤蟹所炸成的「蟹油」，再炸香蒜片，冇得學兼超大工程，想喺屋企試整，最好都係用番佢哋出嘅「蟹油蒜茸王」；做法是先將2斤蟹切件、拍鬆，以大鑊油炸至8成熟；再起熱油鑊放入蟹油蒜茸王240克、豉油、鹽、糖炒香，放入蟹件及葱段炒熟即可：「美味與否嘅成敗關鍵，在於控制火路，蟹面炒得香，但裏面唔可以太亁，先用大火後轉慢火，就要睇你控制火候的能力！」
搵食資料
喜記避風塘炒辣蟹有限公司（28937565）
地址：銅鑼灣謝斐道392號H舖
座位：60人
文通：銅鑼灣地鐵站C1出口，沿謝斐道往灣仔方向，行兩個街口。
人均消費：$150