楊千嬅前晚喺大嶼山廸士尼樂園酒店擔任香港電台舉辦嘅「愛心聖誕大行動2006」亮燈儀式嘉賓，同場嘉賓仲有特首夫人曾鮑笑薇。亮燈儀式後，小朋友唱歌表演助興，現場一片歡天喜地。
英語致辭流暢
由於成個活動喺港台第三台英語頻道現場直播，所以千嬅要用英語致辭，現場見佢都講得唔錯，冇乜甩咳。千嬅話大會畀咗個準則佢，不過都有啲緊張。問千嬅對香港廸士尼有乜嘢感覺，佢話：「我淨係去過日本同美國嗰個，香港同法國嘅都未去過，今日我都只係去酒店同參觀咗個廁所。」問佢打算幾時去廸士尼玩吓，千嬅話：「唉！唔通一個人去行？又會話我唔開心，爸爸媽媽去過又唔會陪我去，等細佬12月喺英國返嚟，到時聖誕叫佢陪我去。」
問千嬅有冇幻想過舉行童話式婚禮，佢笑話：「都鍾意，不過唔好叫我扮米奇老鼠，但都要對方鍾意個形式至得，今年飲太多喜酒，結婚仲係好遙遠，𠵱家係搏殺期，遇到先算啦。」
