中資銀行股呢幾日炒到癲晒，冇貨喺手嘅望住股價係咁升，十分無奈。既然錯過咗銀行股呢班急行列車，𠵱家想搵嘢買，揀乜嘢好？網上有人建議追中資地產股，咁多隻，邊隻最有潛質？
《香港討論區》入面，terryctl1叫大家上車：「中國地產大落後金融股，今日開始追上，大家上晒車未？」
nala2第一個舉手：「272（瑞安房地產）上咗車。」
原來terryctl1都係小股東：「我都係，賺到死咗，而且佢仲未追落後……睇嚟有排升。」
a44就對「大落後」呢個字眼有保留：「中國地產大落後？咁之前價位升嗰啲係乜？」
hkdoctor都係咁話：「都炒咗幾星期，落後？你都好慢動作，面值已經炒到有溢價，不過唔知幾時到頂。」
狗籠屎業亦係喺「大落後」呢3個字上發表意見：「唔係嘩！隔三兩星期就炒一轉，已炒咗兩三個月，仲話追落後？只係國內經濟強勢，根本宏調都阻唔住！」
中資地產股近半年表現矚目，雖然中央間唔中就拋個宏調出嚟窒一窒投資者，但地產股一於少理，照升可也。睇吓中國海外（688）同華潤置地（1109）呢兩隻龍頭股，由6月低位到𠵱家，升咗成倍，散戶睇見點可能唔心郁。
一浪高過一浪
近期股市特點之一係強者愈強，如果想追中資地產股，除咗上述兩隻龍頭股外，仲可以考慮投機短炒一轉瑞安房地產（272）。
瑞房係瑞安集團嘅旗艦房地產公司，係內地主要房地產發展商之一，今年10月頭掛牌，招股價5.35元，噚日收6.78元，升27仙，升幅4.15%。圖表上，隻股由上市到𠵱家，每次調整浪底都高過之前一個浪底，噚日最高見6.79元，係上市以嚟新高，動力甚強，短炒第一個月目標睇7.50元，升穿可挑戰8蚊，但如果跌穿6.50元先止蝕。
余文