08年北京奧運會，中央指導方針係節儉辦奧運，幸好喺海外富商華僑鼎力支持下，單係建設新運動場館嘅贊助，至今已逾6億人仔，連埋意向性捐款合共9億，當中以已故愛國商人霍英東捐款最多，一個人就捐2億，其他香港富商如李嘉誠、李兆基、郭炳湘同曾憲梓都有科水。
至於奧運經營運作開支，北京奧委執委副主席王偉，噚日喺香港話，有32家中外企業做北京奧委合作夥伴、贊助商或供應商，以及11家國際奧委會全球合作夥伴作贊助支持，唔需要國家同北京市財政支持。
奧組委官員話，今次奧運售票700萬，估計帶嚟1.4億收入；透過北京奧運標誌嘅特許產品銷售收入，估計有5000萬美金；最大收入嚟自電視傳播費，仲有贊助商費用。
明年將發售奧運會入場票，屆時香港都有銷售點，售賣各場賽事，但會有上限。至於票價，佢話會以祖國嘅國情釐訂。今次大型國際盛事，北京奧組委計劃搵10萬名義工協助，單係北京，已有22萬市民報名，熱情澎湃；香港明年3月接受市民申請到北京做義工。
今次北京奧運有個特色，將奧運火炬第一次登上珠穆朗瑪峯。大會仲顧及舉行期間嘅空氣質素，明年中開始，所有工地都要停工，減低沙塵污染。
話晒港商捐咗成9億人仔出嚟，一班奧組委官員噚日喺香港一個京港研討會上，都同大家交代吓籌辦嘅進度。