港股成功企喺19000關上面收市，報19093，係第1次，不過，好戲在後頭，昨日個市升勢好全面，就算隻大笨象滙控（005）微跌，技術走勢都好靚，跌勢喘定，低位反彈高收，今日應該會反彈為個市助興。
美國嗰邊嘅通脹數據反映通脹回落，經濟亦回落，投資者𠵱家唔單止係憧憬美國聯儲局減息，直情係迫佢減息，睇吓呢幾日美債嘅升勢就可以睇到啲嘢。啲分析員其實都好「理智」，話聯儲局年底嘅會議唔會減息，最大機會就係喺出年嘅1月或者3月，睇嚟好合理，不過，話佢哋理智就不如話佢哋「聰明」，點解？若開始減息，係意味1個周期，無論如何喺一段時間內都會對股市有利好作用，咁樣，如果炒減息嘅時間長番啲，咪仲好炒？
昨日個市氣氛好，今日應該會繼續炒上，如果升幅又係200點以上，成交就有機會破600億元，港交所（388）必然受惠。國企股方面，仍以銀行股最閃亮，工行（1398）喺大戶撐場下，企喺4元收市，C輪4449同9909都有好好表現。
中移動C輪3496：昨日提過，滙控偏軟唔使驚，因為中移動（941）好醒神，昨日升上68.35元收市，走勢好靚，來勢洶洶，個市要向上走，中移動幾乎篤定破70元關做舵手，先睇73元，破咗位就睇80元。
隻C輪3496昨收1.03元，仲有104日壽命，溢價2.9%，好抵，槓桿率6.6倍（有效5.4倍），對沖值0.81，引伸波幅回升，有助升勢，正股升上73元同80元，3496應該升上1.40元同2元樓上，呢個價買番啲，正股跌穿66.30元止蝕。
俊樺