要炒嘅始終要炒，查爾頓領隊杜維終於喺周一晚俾球會炒魷魚，成為今季英超首位被炒領隊！呢隊波聯賽形勢水深火熱，如果杜維夏天唔係亂掟錢落海，如果佢唔係舉棋不定……查爾頓都唔會沉淪到𠵱家咁！
古比士利無意出山
查爾頓上周六聯賽輸畀韋根2:3，位列聯賽榜尾，作客仲未贏過波，教過水晶宮同奧咸嘅杜維，12場聯賽就執包袱走人！同查爾頓同甘共苦咗15年嘅古比士利，知道杜維被炒後，即時出嚟澄清話無意重掌教鞭。
查實球隊今季畀咗1,000萬鎊（約1.5億港元）杜維擴軍，點知佢亂咁使，好似驚啲錢會食人咁。今夏10個新兵中，淨係安祖列特、蘇利文尼廸亞華拉同埋查奧爾，就用咗近800萬鎊，名就長過人，表現呢？不提也罷！
球會高層大開水喉，點知杜維開季就騰雞，怕班舊將發惡，唔多敢用自己班人，之後先慢慢滲入新兵，將賀蘭特、堅斯舒夫等打入冷宮，令隊波冇晒骨幹同精神領袖；之後屢戰屢敗，又拎番班舊將出嚟，咁舉棋不定點做揸弗人？
查爾頓提升咗杜維嘅前副手列特做主教練掌管一隊，不過博彩公司就列荷杜為下任領隊大熱，你又有乜竟見呢？
「雖然查爾頓年年都係陪跑，但佢好代表到一班窮人嘅奮鬥史，窮，都可以好似佢哋咁喺英超捱足咁耐（99年曾降班1季），我求大俠惟有祝佢哋前程錦繡啦。」