最近喺多個網上討論區都流傳住一個有關恒基地產（012）旗下新盤──屯門豫豐花園嘅風水話題，聽起嚟都幾毛骨悚然。
網友cae688煞有介事咁奉勸大家，千祈唔好買豫豐花園。佢話︰「我自己本人住藍地，睇住佢起，而差唔多全部喺藍地住嘅人都知，佢一起地盤嗰陣，就有一個喺地盤做嘢嘅人死咗，之後，藍地入面石塘又有一個男仔跌咗落湖死咗。大家有無留意，佢一起個地盤無幾耐，隔離劉金龍妙法寺就起咗尊佛像同放骨灰嘅地方？就係因為要鎮住個塊地。而佛像未起好嗰陣，地盤都停晒工。雖然佢哋用木板圍住個地盤，但我哋呢啲日日喺藍地出入嘅人都會見到，木板裏面有啲白布，而白布用紅筆寫咗啲好似佛符嘅字，嗰陣我附近啲隔離鄰舍，個個都講嗰度好恐怖……。」
地盤意外平常事
佛陀見證人以專家嘅口脗指出︰「其實呢個就係風水問題，因為在移走荔枝園時，並沒有把樹上的荔枝果實拔掉，著名風水家正翁先生喺其著作中，也有提及這些事……」
不過，一班無神論嘅網友就作出大反擊。totoberry反問︰「全香港地盤，又有邊度係未死過人呢？」blwhlee亦係咁講︰「死過人又點？可能幾百萬年前嗰度死過好多恐龍㖭……怕唔怕呀??」
其實風水呢家嘢，真係信不信由你。記者反而覺得，豫豐花園買唔買得過，應該考慮佢嘅地點、交通及定價合唔合大家嘅心水。
資料來源︰Uwants.com討論區、yahoo網上討論區及香港討論區