根據美國憲法，美國人享有言論自由嘅權利。不過，如果老闆不准員工在辦公室講粗口，違規者會被解僱，這又算不算干涉言論自由？在《MSNBC》討論區，有網民暢談在工作場所「爆粗」的看法。
TexasDan話，喺工作場所講粗口，係唔恰當嘅；佢以前嘅英文老師講過，經常爆粗嘅人係唔識表達自己，語言能力好差。喺佢間公司，員工講粗口會被即時炒魷，每個人入職嗰陣，都知道呢條規則。
VirginiaMom唔反對人哋喺私人場所爆粗，但認為如果喺公眾場所（包括工作地點）大講F字頭嘅粗話，就好唔尊重自己同埋其他人。另一網友IM4ME話，愈嚟愈多人使用粗鄙嘅說話，反映社會嘅容忍尺度已降低。
有拗撬爆粗勝打交
不過，喺化工廠做嘢嘅alex_vz4959就另有見解。佢話，由於工作壓力大，啲員工有時要講粗口去加強語氣，先可以盡快完成工作。佢聽慣晒，所以唔會感到困擾同尷尬。
喺餐廳做女侍應嘅lady_firebird講，佢做嘢嗰陣，有時都會爆粗，但只要唔好畀客人聽到，講粗口係冇所謂嘅。
phaahker話冇乜嘢大不了，有時反而可以紓緩壓力；員工之間如果有拗撬，爆粗總好過打交。佢好鍾意佢份工，就係因為佢老闆「出口成文」，同佢好夾。